تدوينة اليوم + مشكلة اليوم غير مشكلة زمان

السلام عليكم ورحمة الله وبركاتة 

من الاشياء الي دايم نسمعها وفكل قضية حاشرين هاذي المقولة من مبداء التخفيف 

* الكتمان يولد الانفجار *

في الوقت الحالي سرنا نسمع اشياء تشيب الراس قضايا غريبة عجيبة

وفي النهاية كل شيء يقولو الجملة المذكورة فوق 

طيب نقول كتمان مع انو في الوقت الحالي ما في كتمان ولا في بطيخ

لانو النت وتنكنولوجيا تدخلت في حياتنا فزاد الانفتاح و سار العالم كلو قريب من بعضة

يعني زمااان الي يبي وظيفة هو يروح يدور ويمشي من مكان الي مكان 

اما الاحين يقدم من النت واذا اسمه طلع في الوظيفة ارسلوله رسالة على الجوال

في اسهل من كذة ...

شكلي تحمست شوي ههههههههههه

الاطفال و الايبود 

الحين الطفل عمرة 3 سنين ومعاه ايبود او ايفون 

ويكبر الطفل شوي شوي شوي 

الين ما يسير عمره 7 سنوات ووقتها راح يكون فر النت فره كاااملة سوا مسح كامل على كل شيء في النت 

وسار يعرف انو النت في اشياء مفيدة وكويسة واشياء وسخة وقليلة ادب 

انا اشوف انو كامل الاخطاء على الاهل الي يقولك خلااااص نشغل خاصية القيود في اجهزة ابل وخلااص

كذا الطفل ما راح يحصل الاشياء قليلة الادب 

هذا اكبررر خطاء يرتكبو الائباء في حق الابناء 

لانو خاصية القيود في اجهزة ابل ما منها فايدة بس كدة ما تمنع الاشياء +18

الطفل لمن يشوف اي شيء غريب راح ينشد له...

ويحاول يستكشف ووقتها يطيح في يد ناس ما تخاف ربها 

ووقتها يطيح الطفل في اشياء الله يعلم بها ويشوف اشياء ممكن تجرح طفولته و تكسرها

طيب انت يا الاب او الام او الاخت او الاخ 

كيف ممكن تكتشف انو اخوك او ولدك او بنتك ممكن يكون طاح في الاشياء ذيي

تلاقي الطفل الفاظة سارت مش ولا بد 

يعني سار يكثر من كل خ..... وكل ز...... >>> هههههه عاد النطق واااضحة 

كمان الجلوس لفتراة طويييلة على النت وسبحان الله الاجهز المحمولة سهلت المصيبة اكثر من الابتوب بسبب سهولت فتحها

ضغطة زر والجهاز مفتوح لا ينتظر تحميل ولا يحزنون

كمان الانعزال وعدم الخروج من البيت بحجت الوجع وهو ما فيه ضربة الدم 

النصيحة `````

ياليت الاهل يصحو من الغفلة لانو النت زي ما انا وانتو عارفين مليان بلاوي مطينه 

والاشخاص الي ما تخاف ربها ويستغلو الاطفال زي النمل في النت 

افضل شيء تعين وقت يوميا للاجهزه وباقي الوقت خلو الاطفال يستغلوها باشياء تفيدهم او دوريك كاخت او اخ 

انك تشغل اخوك الصغير معك 

البنات 

حاول تخلي اختك تنشغل بشيء مفيد زي الطبخ او اشياء زي كدة والبنات اكيد ليهم الاهتمامات الخاصة فيهم 

وكذالك الشباب حاول تشغل اخوانك معاك باي شيء وافضل شيء انك تاخدهم تمشيهم او اي شيء ثاني 

مثلا يبغو يكون لهم حساب في التويتر او انستغرام يكون بعلمك و موافقتكم 

وكمان تفتيش الجهاز بشكل مستمر وعلى غفلة 

في النهاية ترا كثرة الاجهزة المحمولة من ايبود للبلاك بيري 

مثل القنابل الموقوته فياليت تحمو اطفالكم قبل ما يخطلت الحابل في النابل 

ومع السلامة .

اللـهم اهـدِنا فيمَن هـديت .. وعافـِنا فيمـَن عافـيت .. وتولنا فيمن توليت .. وبارك لنا فيما أعطيت .. وقِـنا شـر ما قضيت .. انك
تقضي ولا يـُقضى عليك.. اٍنه لا يذل مَن واليت .. ولا يعـِـزُ من عاديت .. تباركت ربنا وتعـاليت .. لك الحمد على ما قـضيت .. ولك
الشكر على ما أعـطيت .. نستغـفـُرك اللـهم من جميع الذنوب والخطـايا ونتوب اٍليك.

قناة جدا مفيدة لمحبي التكنولوجيا + #شكرا_سعود_نولوجي

السلام عليكم ورحمة الله وبركاتة كيفكم انشاء الله بخير 

كيفكم انشاء الله بخير الحمد الله رمضان عدا ولا حسينا فيها يا رب تعوده علينا وعلى جميع المسلمين يا رب 

انا من الاشخاص الي من فترة بسيطة فتحة المدونة ودخله من باب الهواية 

وسبحان الله حبي لتدوين قوي عندي حب الاستكشاف والاطلاع 

والحمد لله في الفترة هاذي اشخاص كثار دخلو المدونة وانا اعترف انو انا اكتب في المدونة بدون علم اهلي 

فشكرا لكل الي دعموني 

من فترة وانا ابحث في النت شفت قناة في اليوتيوب خراافية وانا متاكد انو اغلبكم يعرفها وهي 

مدونة سعود نولوجي

للاسف اني ما لحقت على المدونة بس شفت الفديوهات الي في القناة على اليوتويب 

هذا الشخص اقل ما يقال عنه انه خورااافي و شخصية جميلة جدا 

انا شفت له فديو زمان بس ما دخلت على القناة 

من جد شيء رائع وشغل متعوب عليه 

من تصوير ....الي القاء .....الي روح جميله 

لاكن لللاسف****

اغلق المدونة بسبب قلت الدعم اشخاص مثل سعود ليش نخسرهم 

ليش دايما الشيء المفيد هو الي يروح بصراحة انا اقولها وانا مره زعلان .

حاب اقدم شكر لسعود واقولك الله يجزاك الخير ويعطيك على قد نيتك 

ويجزاك الخير .

شكرا لك سعود الخميس 

شكرا لك سعود نولجي .

وهاذي بعض الفديوهات الخاصة فيه :

مع السلامة,

#شخص_يبتغي_الاجر + ثرثره + مواقف تطبع اول انعكاس

السلام عليكم ورحمة الله كيكفم انشاء الله بخير 

زمان ما كتبت بوست عارفين رمضان و حوسة رمضان بس رمضان هاذي السنة غير مشاء الله عدا زي الريح وما لقينا نفسنا 

الا في العشرة الاوخر يا رب اغفر لنا ورحمنا وكتب لنا الاجر في في كل مكان وزمان .

رمضان ذا صارت لي مواقف انا استغرب منها شيء يعني فوق التصور الانسان بطبيعته طماع ويحب كل شيء له وفي ناس 

العكس يحب المشاركة و انا اسميهم هاذي الفئه ( تمشي وتبغا الاجر ) وانا لو معي دروع تكريم ممكن اسلمها 

لناس عملو اشياء بسيط بس فيها انسانيه بشكل غير طبيييييعي شخص يسوي الخير وانا متاكد انو عارف لمن يعطيك ظهره اكيد بتدعي له وبتقول الله يوفقه عملي لي الشيء الفلاني  الله يجزاه الخير 

اول موقف سار معي في صرافة احد البنوك كنت عند الماكينة الخاصة في الايداع المهم ما بقا في الطابور غير انا وثلات اشخاص بعدي

واغلب الي يودعو قبلي ما تنقبل منهم الفلوس يا تكون قديمة او او او يعني مشاكل في نفس الفلوس 

وجا الدور عندي المهم قبل وادخل الفلوس وترررررريينق وتررررررينق و انودعت نص الفلوس وطلعت لي 500 وافرد فيها 

وامعط فيها وادخلها وتطلع و فجاة يدخل الشخص الي انا للحين لو اشوفه فمكان غير اروح واشكره        

                                                        

( من جد شخص يمشي ويقول ابغا اجر او دعاء منك )

المهم شافني وانا اقلب واعدل بل 500 و قلي جيب الفلوس وابدلها لك من الفلوس الي هو صرفها وانقبلت وسوى نفس الحركة 

مع الي بعدي الين ما تاكد انو الكل اودع  هذا الاحسان بعينه فلحمد لله على نعمة الاسلام وانو للحين في ناس فيها خير .

 

ثاني موقف سار معي قبل كم يوم عند محل الطعمية هههههههه ايوة محل الطعمية او" الفلافل " تعرفو برمضان تسير زي 

البسطات يعني برة المحل نفسة يبيعو الطعمية والسمبوسة و الخ ......

المهم جيت قبل الاذان ب 15 دقيقة او اقل كمان المهم قلت لشخص اعطيني طعمية بريالين قلي طيب و كان جنبي حرمة ورجال 

من الجنسية السودانية المهم قاعد يحط لهم الطعمية ورفع راسه وقالي للاسف خلصت الطمعية قلتلو طيب وتسير المفاجأة ولا 

الرجال والحرمة يقول لرجال اعطيه من حقتنا واعطاني بريالين وهم اخذو بنفس القيمه . 

بس الله نبداء : 

انا النوعيات هاذي نادر ما القاها من جد يعني شيء حتي التعبير يعجز عنه قمة في الانسانية يعني تنازلو عن شيء كانو اخذينة 

وكانو طالبين من قبلي بصراحة انا انصدمت من كمية الانسانية الي فيهم هذا الموقف لايمكن انساه . 

انا الشخص ما اعرفه ولا عمري شفته بس موقف زي كدة اعطاني انطباع يا لطيييييف عنهم شايفين اول موقف هو الي يحدد 

نظرتك للانسان اذا كان جيد او بطال . 

وكمان الموقف ذا كان فمكان شعبي شوي بجدة ولمن جاء وقت الفطور انا افطر اكل من الفلافل واذكر الموقف واقول هاذي العائله لو في منها 100 كان العالم بخير . 

اتمني تشاركوني بتويتر على هاشتاق #شخص_يبتغي_الاجر

وكل عام وانتم بخير مع السلامة .

تويتر 

https://twitter.com/MJAREBATEE

ثاني ظاهرة غريبة برمضان ( لازم يكون لها حل )

السلام عليكم ورحمة الله كيفكم وكيف الصيام معاك انشاء الله يكون شهر خير ورحمة على 

الجميع ويعوده علينا وعلي جميع المسلمين يا رب ❤

اول مشكله كانت عن النوم وما النوم وهذا شيء شخصي بعد الي شفته امس انا 

بصراحة الشيء ذا جايبلي الضغط من السنة الي راحت 

عن شخص اقل ما يقال في حقه سااااااااااافل وما يخاف ربه يعني احنا في شهر فضيل ما 

تدري يجي عليك السنة الجاي او لا شهر خير ورحمة ومغفرة واكثر صوت ينسمع في الشوارع وفي الحواري اصوات المساجد من صلوات وزيادة عليها التراويح وانت يا روح امك ماشي 

بسيارتك وحاط صوت الاغاني على الاخر ولا مبسوط كمان وفاتح الشباك كمان يعنو اسمعو يا خالق الله 

طيب اول شيء انت ما تخاف ربك و لا تقدر كبير ولا صغير تبغا تسمع اغاني اسمع لحالك مو 

لازم تسمع خلق الله ولا وقت الصلاة عساك بلي ما ينذكر يا رب .

طيب لا تحترم الناس ولا الأمام احترم المسجد الي تمر من جنبه احترم ربك يعني مو لدرجة هاذي الوضع يسير زي الزفت شهر مبارك الواحد يبغا يتلذذ باصوات المساجد والقران وانت يالي ما 

تخاف ربك ماشي ورافع صوت الاغاني عساك بي........وكمان ...........

بس انا نفسي اعرف وش يحس فيه يعني منبسط ومسوي فله وشوفو يا خلق الله انا معي السيارة ترا زيك زي المزهرية ولا المزهرية المغبرة كمااان 

الله يهدي الجميع و يفكر الشخص الي يسوي الحرات ذي شوي انو يستغل الشهر و ما يضيع كانو شهر عادي لانو ممكن السنه جاية ما يجي عليه 

( لا تفكرو انو انا واحد عمري 30 او 40 لا انا زي اي شاب اسمع اغاني بس الشهر لي احترامه وله تقدير )

اللهم إني أعوذ بك من شر ما عملت ومن شر ما لم أعمل .

اللهم إني أعوذ بك من يوم السوء ، ومن ليلة السوء ، ومن ساعة السوء ، ومن صاحب السوء ، ومن جار السوء في دار المقامة ❤

مع سلامة ٠

حادث لي مع النار + شيء ضروري لازم تسونه اليوم *رمضان كريم

السلام عليكم ورحمة الله وبركاته 

رمضان كريم وكل عام وانتم بخير الله يعينا على الصيام والقيام ويعين الي ماغير نوم 

طوول النهار واكل طول الليل مشاء الله يتسحر 

ونووووم الين المغرب بعدين يفطر و ياكل الاكل الزيادة من الفطور تصبيره وبعدين 

يتسحر وعلى كذة ايش النظام " المعفن ذاااااااا"

انا ما اقول انا ما اكل غير شوربة و لبن واشياء زي كدة لاااااا انا عادي زي اي 

شخص سعودي اكل على الفطور ما لذ وطاب  وبعد الفطور اكل

والسحور بس انا من 10الصباح تلاقيني مرتز وانام بعد صلاة الفجر على طوول مو 

نظام ولا شيء هذا الي المفروض يكون طبعا رمضان حلاوته كذا تنام بعد السحور 

والصبح تكون متواجد.

 البنات او الشباب 

العزابي الي يطبخ لحالةاو البنات الي يطبخون برضوو انتبهو من الغاز او * البتوقاز* 

صحيحه الكلمة حاول تعملو 

صيانة عليه اليوم و تتاكدو من صحتهة لانو النار الله وكيلكم بتلسععع انا من 

الشباب الي يحبو يطبخو من عمري 7 وانا دايم اخلط الكيك لمن امي تسوي او اقلب 

شيء على النار والحين عمري 17 وهذا الشيء محتفظ 

فيه لانو الواحد ما يضمن عمره يسافر او يدرس بره على الاقل ما يعتمد على المطاعم 

اعتدام كلي المهم امس كنت ابغا  اصلح الغذاء لاهلي 

قلت لهم بسوي دجاج ورز و جت الموافقه والحمدلله سويت الغذاء و عجبهم وبعدها 

حدث ما لا يحمد عقباه حتي السفر انا لميتها يعني اهتمام 

من الي ودخلت المطبخ وحطيت المواعين على المجلاي ولتفت على البتوقاز ابغا اقفل 

الاسطوانة حقت الغار و بووووووووم النار طلعت من 

كل مكان في الفرن  بس الحمد لله اضرار بسيطه حرق 

برجلي و المؤلم اكثر الشعر الي برجلي احترق والله 

عذاب فنتبهو على انفسكم خلال رمضان من الغار واقفلو الاسطوانات على طول بعد ما 

تخلصو منه ولا تنسو زي ما قلت تشيكو عليه وانتبهو اذاا عندكم اطفال . كمان اذا 

تعرضو لاي شيء مشابه لا سمح الله اغسلو المنطقه الي جات عليها النار بماء بارد 

بعدين حطو نشاء الذرة عليها 

تكملت القصه وبس بعد المغرب نزلنا نجيب غاز جديد مشاء الله العالم كلها تشتري قبل 

رمضان شكلو امس كان يوم الانفجار العالمي الله 

يحمي جميع المسلمين من النار و اضرارها و زي ما قلت رمضان كريم عليكم           

وكل عام وانتم بخير مع السلامة .

اللهم آتنا في الدنيا حسنة وفي الآخرة حسنة وقنا عذاب النار .

اللهم إني أعوذ بك من الفقر ، والقلة والذلة وأعوذ بك من ان أَظلِم أو أُظلَم .

يامقلب القلوب ثبت قلبي على دينك.

ثرثرة + ظاهرة غريبة "بس منتشرة " بشكل غريب

السلام عليكم ورحمة الله وبركاتة : 

كيفكم وكيف الاجازة معكم انشاء الله بخير 

سبحان الله من الاشياء الي تجيب لي الضغط و السكر وحموضة المعده لمن شخص يدخل مكان 

وما يقول السلام عليكم ورحمة الله 

او العكس  انا ادخل المكان واقول السلام ومحد يرد على  

هذا الموقف انا داايم اواجهه في البقالة اكثر شيء استغفر الله بس 

خليني اقلكم على موقف صار لي في احدى الايام :

كنت قاعد في البيت المهم وعلى الساعة 12بليل اشتهيت الكتكات المهم قلت خليني اروح للبقالة 

اشتري وادخل البقالة و المشكلة مليانة يعني غير راعي البقالة ممكن 7 اشخاص المهم دخلت قلت 

السلام عليكم ولا احد رد سمعت صدي السلام ما غير راعي البقالة بس الي رد السلام ولا كمان 3 منهم واقفين عند الحساب وادخل شوي وبصوت 

واطييي قلت وجع فبطنك الكل لف وجهه وسار يطالع فيني يعني سبحان الله سلام الله ما ردو عليه ولا احد اعطاني وجه ولمن سمعو كلمة زي ذي مشاء الله السمع صار 10/10

والعكس الي يدخل مكان واخذ وضعيت القمط ( لا سلام ولا شيء ياعمي انت داخل على مسلمين مو على مجوس )

انا الحمد لله اهلي ربوني على السلام وكلمت شكرا لمن احد يقدم لي خدمة والعكس انا احب الشخص الي يقولي شكرا لمن اقدم له خدمة .

لسانك ما راح ينقطع او يتجرح اذا قلت السلام ( والكلام لكي كمان يا مدموزيل ) 

هذا زعلان منه  "البنات" هاذي ما اكلمها ذي تتكلم على حتي لو بينكم خلاف كبير او ما تتكلمو دخلت او دخلتي مكان قول السلام واجرك على الله .

السلام او التحية ما راح تقلل من قدرك او من مكانتك بلالعكس راح تعطي انطباع جدا جميل عند الناس و غير كدة يدخل الاطمئنينه فقلب الي تلقي عليه السلام.

وانا بصراحة اشوف الضاهره هاذي بصراحة قلة ادب بس الكلام مو للجميع في ناس مشاء الله عليهم حتي لو ما يعرفك مو سلام بس الا مصافحة بليد  انا الفئة ذي احطها فوق راسي 

قال النبي صلى الله عليه وسلم: "لا تدخلوا الجنة حتى تؤمنوا، ولا تؤمنوا حتى تحابوا، أولا أدلكم على شيء إذا فعلتموه تحاببتم؟ أفشوا السلام بينكم"

ولي ما يردون السلام اقراالحديث الشريف 

وأما رد السلام ففيه قول النبي صلى الله عليه وسلم: "خمسٌ تجب للمسلم على أخيه: رد السلام، وتشميت العاطس، وإجابة الدعوة، وعيادة المريض، واتباع الجنائز"

مع السلامه.

الجو حار (بس الصدقة تفرح قلب انسان )

السلام عليكم ورحمة الله وبركاتة

البوست الي راح تكلمت عن الام وعن قصة جدا جميلة 

قصة سيدتنا هاجر وسيدنا اسماعيل عليهم السلام من جد كان من المواضيع الي انا جدا حبيتها واستفد منها 

سبحان الله تضحية الام موجودة من قديم الازل الله يحفظ جميع امهات المسلمين .

في شخص من المتابعين من اول ما فتحت البلوق متابعتني يوزرها في تويتر @shoshoalali1 

اقترحت على اكتب موضوع عن الصدقة والعمال الي بيشتغلو في هذا الجو ان صح التعبير (الحاارق)

طيب اول شيء ابغاكم تتمعنو في هاذي الصورة معي:

*جميع الصور من تصويري وبدون استخدام فوتوشوب 

هذا الشيء الي عامل النظافة او اي عامل في الشارع وفي هذا الجو الحاار

يفكر فيه....

يشتغل وغير المسافات الي يقطعا مشي غير الحرارة الصادرة من الشارع وغير والمضايقات الي يحصلها

من سوء التعامل الي... احياناً الضرب والاهانة.....

طيب ليش ؟؟؟؟ يعني تضحك على دمعت العامل المسكين ؟

بس ممكن تجي انت وتهون عليهم وتفرح قلوبهم بهذا الشيء 

انا ما اقلك جيب كراتين موية وسوي وسوي واعمل 

على استطاعتك وعلى مقدرتك لو ب1 واحد موية ام نص.

صدقني راح تحس بفرحة غير طبيعية 

وهذا غير الاجر وغير الدعاء الي بتحصله باذن الله 

انت او انتي حط نفسك مكانه ايش بيكون احساسك والله غير تفرح و طير من الفرحة كمان 

درجة الحرارة يوميا ما تقل عن ال30 وايام توصل لل40

وكمان لو ترافقها ابتسامه مع الله يعطيك العافية .

تكون من جد كانك ملكت الدنيا كلها 

*جميع الصور من تصويري وبدون استخدام فوتوشوب

قال الله تعالي ( وَ جَعَلْنَاْ مِنَ المَاْءِ كُلَّ شَيْءٍ حَيٍّ أَفَلاْ يُؤْمِنُوْنَ)

{ والصدقة تطفىء الخطيئة كما تطفىء الماء النار }

*جميع الصور من تصويري وبدون استخدام فوتوشوب

وكمان حديث عن الرسول صلي الله عليه وسلم 

 عن أبي ذر رضي اللّه عنه أن رسول اللّه   قال:

   بينما رجلٌ يمشي بطريق اشتدَّ عليه العطشُ. فوجد بئرا فنزل فيها، فشرب، ثم خرج، فإِذا كلبٌ يلهَثُ، يأكل الثَّرَى من العطش. فقال الرجل: "لقد بَلَغَ هذا الكلبَ من العطش مثلُ الذي كان قد بلغ مني ".

   فنزل البئرَ، فملأ خفَّه ماءً، ثم أمسكه بفيه حتى رقِي فسقى الكلب. فشكر الله له، فغفر له.

   قالوا: "يا رسول اللّه، وإن لنا في البهائم أجرا؟ ". فقال: " في كل كبِد رطبة أجرٌ".

(متفق عليه)

وكمان لا تنسو ترا ( الابتسامه في وجه اخيك صدقة ) .

تويتر :

https://twitter.com/MJAREBATEE

مع السلامة.

زُمي يا زمزم ....(قصة عن تضحية الام )

السلام عليكم ورحمة الله وبكاتة كيفكم انشاء الله بخيير 

الحمد لله خلصت الاختبارات على خير انشاء الله تكون اجازة صيف خيير عليكم انشاء الله . ويارب بلغنا رمضان بخير وسلامة وعافية يا رب .

اليوم حاب اتكلم عن قصة من القصص الي من جد من قديم قديم الازل والشيء ذا للحين موجود وجميع المسلمين 

يعرفو قيمو المعنوية والصحية ماء زمزم وقصة ماء زمزم وكيف الام تضحي عشان ولدها من جد شيء يقشعر البدن 

قصة سيدتنا هاجر زوجة سيدنا ابراهيم وابنها اسماعيل عليهم السلام .

بسم الله :

هاجر كانت الزوجة الاولي لسيدنا ابراهيم عليه السلام وسبحان الله انجبت اسماعيل عليه السلام وكان سيدنا ابراهيم 

يبلغ السادسة والثمانين من العمر ما كان له ذرية والله سبحانه استجاب لدعاءة ورزقه في عمر الثمانين بولدين من 

سيدتنا ساره اسحاق عليه السلام ومن هاجر اسماعيل عليه السلام وبعدما ولدة هاجر وحكمة الله سبحانه انو ممكن 

تسير مشاحنات وخلافات بين هاجر وسارة وابنائهم امر سيدنا ابراهيم انو ياخذ هاجر وابنها استجاب ابراهيم لامر 

ربه واخذ هاجر و سيدنا اسماعيل مو عارف وين يوديهم ويمشي وسيدتنا هاجر تمشي وكان سبحانه من خوفه على 

زوجة وابنه كل ما مر في مكان فيه زرع وخضار ونخل  وماء يسال ربنا سبحانة وتعالي يقول : الي ههنا يا رب ؟ 

ويرد عليه جبريل : أمض يا ابراهيم 

و واصل سيدنا ابراهيم وسيدتنا هاجر وابنهم اسماعيل المشي الي ان وصلو مكة ما كان فيها لا زرع ولا ماء ولا 

نخل ما كان فيها غير حرارة الشمس . 

وحان انو ابراهيم يترك زوجته وابنه في المكان الي لايوجد فيه لا سكن ولا بشر ولا شيء وخافت سيدتنا هاجر وتعلقت في سيدنا خافت على نفسها وعلى ولدها وكان سيدنا ابراهيم يناجي ربنا وكان ياتي الجواب لا تردد فيه وقال لسيدتنا هاجر  : إن الله هو الذي أمرني بترككم في هذا المكان، وهو لاشك لن يضيعكم. فلاذت أم إسماعيل بالصمت، ورضخت هي الأخرى لما أراده الله ثم قالت: إذن لا يضيعنا .

ورجع سيدنا ابراهيم الي الشام وقلبه متعلق بمكة و زوجته و ولده .

كان مع سيدتنا هاجر قليل من التمر وقربة فيها شيء بسيط من الماء وخلص الماء وخلص والتمر واشتد الحر و اصابها العطش هيا وابنها وكانت تشوف ولدها يتلوى ويصرخ من الجوع والعطش  فما قدرة تشوف ولدها  انو

ممكن يموت من الحر والعطش وما استسلمت للمصير الي ممكن يفقدها ولدها وقامت تبحث عن الماء في الوادي المسعي حالياً ( الصفا و المروة)  

كانت تبحث و تبحث الين ما انهكت ووقفت على جبل الصفا و لاحظت سراب ماء على جبل المروه فنزلت مهرولة من الصفاء الي المروه وما حصلت شيء وشافت سراب ماء علي جبل الصفا ونزلت مهرولة من المروه للصفا و 

كل مره نفس الشيء الين ما اكملت سبع مرات الذهاب من الصفا  والمروه .

وكانت صورة طفلها ما تفارقها وفي المرة السابعة اشتد عليها التعب و الانهاك واشتد العطش و فجاء !! نظرة الي سيدنا اسماعيل وشافت الماء يخرج من تحت قدميه عليه السلام  وراحت مسرعة وشافت الماء فاخذت تجمع الرمل من حول العين عشان يتجمع الماء وما ينشتر عشان تقدر تشرب منه وتقول للماء  ( زم زم ) 

فشربت من الماء الين ما زال العطش وانحنت على ولدها عشان تسقيه من الماء وتروي عطشه.

تضحية الام شيء كبيره وهذا اكبر مثال عليها يعجز اللسان انو يتكلم او يجيب مفردات للتعبير عن هاذي القصة .

وسبحان الله الانسان ممكن يصبر على الجوع ويصبر على حرارة الشمس بس ما يصبر على الماء 

وبصراحة انا استغرب علي الي في وقتنا الحالي يضربو ويعذبو اطفالهم قلوبهم وين راحت . 

في النهاية انشاء الله يكون اعجبكم البوست ولا تنسو التعليقات تحت والاشتراك في المدونة و الفولو بتويتر. 

مع السلامة . 

بخور يوم الجمعة اصالة مجتمع خليجي

السلام عليكم ورحمة الله وبركاتة 

اليوم الجمعة  سبحان الله من الاجمل الايام في الاسبوع فيه روحانيه جدا جميله  احلي شيء كمان الخطبة علي القناة الاولي وما يحلا الغذاء الا سمك او فاست فود من سمك وجمبري والخ  بس اغلب الناس ما تاكل غير صيادية الي هوا رز اسود *اذكر وانا صغير ما كنت اوقل عليه غير رز بشوكولاتة  

 

انا او اي شاب او حتي اي شخص ....... كلنا نحب الجلوس بمكان نظيف ومرتب وريحتة حللوه الله يعطي العافية للنساء و البنات الي مشاء الله يطبخو و ينظفو واللخ ... 

لمن تساعد اهلك بامور البيت ترا مو عيب ولا حرام و لا راح تنقص من قدرك او من عمرك شيء

( وَتَعَاوَنُواْ عَلَى الْبرِّ وَالتَّقْوَى وَلاَ تَعَاوَنُواْ عَلَى الإِثْمِ وَالْعُدْوَان ) 

ديننا الاسلامي الشريف حثنا علي التعاون و علي مساعدة الاخرين طيب مو اهل بيتك اولي بلمساعدة ؟!

وسبحان الله يعني 2  في 1  تمرين للجسد وتكسب اجر المساعده .

الرسول صلي الله عليه وسلم كان يساعد اهل بيته ويعاونهم علي التنظيف وكل شيء وكان صلي الله عليه وسلم يخيط الثوب حقه لمن ينقطع صلي الله عليه وسلم  

قال صلي الله عليه وسلم ” خيركم خيركم لأهله وأنا خيركم لأهلي ” انا ما اقلك اشطف وغسل بس في اشياء مرره بسيطه ممكن تساعدهم فيها وبلعكس تراا مره راح يفرحو بهاذي المساعده البسيطة 

كان الرسول يحيك نعله وصلي الله عليه وسلم كان متزوج من 9 نساء ,,,,!!!

شفتو قد ايش الرسول صلي الله عليه كان رؤف باهل بيته 

كانت الامور الخاصة فيه هو الي يقوم فيها وهو اخير القوم وسيدهم صلي الله عليه وسلم 

تمعنو شوي في سيرة الرسول مع اهله صلي الله عليه وسلم .... وشوفو كيف كان يعاملهم .

نصيحة :

اذا انتي أم وعندك اطفال ازرعي فيهم حب المساعده خليهم يشوفو المساعده من منظور ديني 

علميهم كيف كان الرسول صلي الله عليه وسلم يساعد اهله و يساعد الناس لا تخليهم يتكلو 

عليكي بكل شي عوديهم علي حب العمل وانشاء الله راح يطلعو ناس مجتهدين و طموحين ولكلام 

موجة ايضاً لل ( أب ) . 

انشاء الله يكون اعجبكم البوست لا تنسو تعليقاتكم و كمان الفولو بتويتر 

اتمني لكم جمعة سعيدة وحياة اسعد مع السلامة  .

ليش ما نشرب موية(ماء) فوائد+اضرار +وحلول

السلام عليكم ورحمة الله وبركاتة 

كيفكم انشاء الله بخير 

الحين احنا مقبلين على ابواب الصيف وزي ما تعرفو الصيف في السعودية جدا حرر ورطوبة ......

 في شىء مو انا اول واحد اطرحو كثير وكثير طرحو ولي هووو شرب الماء 

هذي المشكلة من زماان ترافقنا وملازمة لنا واحنا للاسف نعرف  فوائد الماء ومع ذالك ما نهتم 

في ناس ممكن طول اليوم الموية ما تشربها غير  مرره وحدة وهذا خطر بحد ذاتة !!!

ممكن بسبب المشاغل وانو نمط حياتنا سار اسرع من اول ... بس برضو اهم شيء 

على الانسان صحته واحنا مجبورين نحافظ عليها وما نهملها 

قال الله تعالى  (  وَ جَعَلْنَاْ مِنَ المَاْءِ كُلَّ شَيْءٍ حَيٍّ أَفَلاْ يُؤْمِنُوْنَ  ) 

البذرة لو حفرنا لها وغطيناها بتراب بدون ولا قطرة ماء ...

راح تطلع راح تنمو اكيد لا 

وكذالك جسم الانسان لو ما شربنا ماء هل راح ينمو بشكل صحيح !!!!

راح ابداء اول شيء في الاضرار الناتجة عن نقص المياه في جسم الانسان :

بسم الله نبداء :

1: الإحساس بالتعب والإجهاد سريعا.

2: شحوب الوجه وانعدام الحيوية والنضارة نتيجة لجفاف الجلد.

3: زيادة مستوى التوتر والانفعال.

4: الصداع والدوخة وضعف التركيز وربما الشعور البلادة.

5: الشعور بآلام في المفاصل نتيجة لخشونة الغضاريف وتيبس المفاصل.

6: جفاف الجلد وضعف مرونته وكثرة ظهور البقع والتجاعيد والطفح الجلدي (الحساسية) 

7: ضعف الدورة الدموية وبرودة الأطراف.

8: الإصابة المتكررة بالعدوى ونزلات البرد.

هاذي الاضرار شيء بسيط ..... هاذي المشاكل معظم الناس تعاني منها واغلبنا مصاب فيها كمان ......

*(زيادة مستوى التوتر والانفعال) نلاحضها اكثر شيء بشهر رمضان الكريم 

الحين راح ننتقل لفوائد شرب الماء 

1:يمنح الجسم الرطوبة الكافية مما يسكب الجلد الليونة ويحفظ للعينين البريق.

2:يجدد حيوية كل خلايا الجسم

3:ينظم درجة حرارة الجسم

4:يعمل على تخليص الدم من السموم والرواسب

5: ينشط وظائف الكلى.

6: ازالة السموم الضارة في جسم الانسان .

7: تحسين الدورة الدموية داخل الجسم 

وفوائد اكثر كمان ..................

لازم نعود نفسنا على شرب الماء بانتظام و كمان تكون قارورة الموية دايم ترافق يدنا مع الجوال و المحفظ والخ 

كمان البنات ممكن تكون دايم قارورة الموية متواجدة في شنطة اليد 

لازم نحارب العادة السيئة هاذي ونتخلص منها للابد ...

واحنا المسليمين الحمد لله ربنا اكرمنا باعظم ماء وجد في وجه الكرة الارضية ماء زمزم الشريف وما تحتوي ماء زمزم من فوائد كثيرة ..............

في شيء  حلو ممكن يساعدنا في شرب الماء بشكل منتظم 

برنامج في الاب ستور جدا رائع اسمو AQUA PLAN

هذا البرنامج خطييير بمعني الكلمة 

يرسل اشعارات بكميات الماء الي لازم تشربوها في اليوم مررره حلوو انصحكم انكم تحملو 

مرره راح يساعدكم علي الانتظام بشرب الماء وهوا حاليا مجاني .

صور البرنامج:

واجهة البرنامج 

الاشعارات الي يرسلها البرنامج 

المعدل لشخص الواحد  8-9 اكواب يوميا

في النهاية انشاء الله البوست اعجبكم واستفدتو منه لاتنسو التعليق عليه اذا اعجبكم 

كمان لاتنسو الفولو بتويتر

A happy day for a happier life

مع السلامة .